الطفل وليد عبادي بقاله 3 سنين بيتكرم من كل الجهات المصرية لحصوله على جائزة اصغر مخترع (بروفسير) في العالم في مسابقة انعقدت في ايطاليا في اغسطس 2015
.
وليد اتكرم من البرلمان والجيش ووزارة التربية والتعليم ووزارة البحث العلمي وطلع في عشرات البرامج مع معتز عبد الفتاح ومصطفى بكري واحمد موسى وشردي احتفالا بهذا الانجاز
.
وفق وكالة ا ش ا الرسمية المصرية فمجلس جامعة دمنهور،كرم الطفل على حصوله على الجايزة وتقرر اختياره كعضو أساسي بنادى العلوم بكلية العلوم
.
بالبحث اتضح ان مفيش اساسا جايز اسمها اصغر بروفسير في العالم في ايطاليا
بالبحث اكتر لقيت ان اول حد نشر الموضوع كانت صحيفة المصري اليوم وكاتبة انه حصل على الجايزة في ايطاليا يوم 9 اغسطس 2015
بالبحث على حسابات الاستاذ وليد ووالده لقيت فيه بوست انه بيحتفل بافتتاح قناة السويس يوم 7 اغسطس وكاتب "االعبقرى الصغير يشارك فى مهرجان افتتاح قناة السويس قبل مغادرة البلاد"
ويوم 8 اغسطس بوست لأحد الاصدقاء بيباركله على حصوله على جايزة اصغر عالم في العالم ووالده رادد عليه "الحمد لله"
مرفق الصورة
.
يعني الطفل وليد بقاله 3 سنين بيتكرم على جايزة مش موجودة اساسا
.دة غير التكريم على جايزة في مسابقة ما راحهاش وهي فضيحة تكريمه لحصوله على الجايزة الأولى في مسابقة ارشميدس في روسيا اللي كشفتها هنا "المصدر موجود"
.
بالبحث شوية كمان اتضح ان الطفل وليد حصل على المركز الأول على مستوى الجمهورية في معرض "انتل أيسف" سنة 2017، ودي الجايزة الوحيدة اللي لقيت حد بيأكد حصوله عليها، وهي داليا محمد، عضو لجنة التنظيم بمعرض "إنتل أيسف" بالبحيرة، واللي قالت ان وليد أخد فعلا المركز الأول في مجال "النباتات" لابتكاره حاجة خاصة بالآفات الزراعية
وبجانب ان دة معرض محلي عديم القيمة العلمية ومالوش لازمة فأبو وليد هو الدكتور محمد أحمد عبادى "أستاذ قسم البساتين بكلية الزراعة" جامعة القاهرة
.
من الأخر وليد طفل ابوه راجل نصاب عرف ينصب على دولة بكل مؤسساتها وبس
